ரெம்டெசிவிர் (Remdesivir)

இந்தியாவில் குறிப்பாக தமிழகத்தில் தற்சமயம் ரெம்டெசிவிர் (Remdesivir) மருந்துக்காக மக்கள் அலையாய் அலைந்து கொண்டிருக்கிறார்கள், காரணம் கொரோனா இரண்டாம் அலை, இந்தியா முழுவதும் ஆட்டிப்படைத்துக் கொண்டிருக்கிறது. இரண்டாம் அலையில் உருமாற்றம் அடைந்த கோவிட்-19 (COVID-19) வைரஸ் மிக வேகமாக பரவி நிறைய மக்களுக்கு தொற்றை ஏற்படுத்திக்கொண்டிருக்கிறது. இதன்மூலம் மக்களின் இறப்பு விகிதமும் அதிகமாக தென்படுகிறது. 

சில நபர்களுக்கு இந்நோய் தீவிரமாக தாக்கி அவர்களின் உடல்நிலையை அதிகம் பாதிப்புக்குள்ளாக்கி மருத்துவமனையில் சேர்க்கும் நிலையை உண்டுபண்ணுகிறது. அந்த சமயத்தில் அந்நோயாளிகளை காப்பாற்ற பிராணவாயு செலுத்தி, ரெம்டெசிவிர் (Remdesivir) மருந்தையும் கொடுத்து சிலரை காப்பாற்றுகிறார்கள். இதனால் தனியார் மருத்துவமனையில் சேர்ந்து சிகிச்சை பெறுவோரிடம் அங்கிருக்கும் மருத்துவர்கள் இந்த மருந்தை வாங்கி வரச்சொல்கிறார்கள். அதுபோல் அரசு மருத்துவமனையிலும் இந்த மருந்து தட்டுப்பாடு இருப்பதால் வெளியில் உள்ள மருந்துக்கடையில் தான் வாங்க சொல்கிறார்கள். ஆகையால் ஒரே நேரத்தில் நிறைய மக்கள் இந்த மருந்தை வாங்குவதனால் இப்பொழுது மிகப்பெரிய தட்டுப்பாடு ஏற்பட்டுள்ளது. 

உண்மையில் இந்த மருந்து கோவிட்-19 (COVID-19) வைரஸ் நோயுக்குத்தான் கண்டுப்பிடிக்கப்பட்டதா? இல்லை வேற நோயை குணப்படுத்த தயாரிக்கப்பட்டதா என்பதை இந்த மருந்து கண்டுபிடிக்கப்பட்ட ஆராய்ச்சி வரலாற்றை பார்ப்பதன் மூலம் தெரிந்து கொள்ளலாம்.

கோவிட்-19 (COVID-19) தாக்கம் உலகம் முழுவதும் இருப்பதால் மருத்துவ உலகம் இந்த நோயை உண்டுபண்ணும் வைரஸின் மூலக்கூறுகளை ஆராய்ந்து அதனை எப்படி கட்டுப்படுத்தலாம் என்று ஆராய்ச்சி செய்தது. அந்த ஆராய்ச்சியில் இதன் மரபணு கூறுகள் 79.5 சதவீதம் சார்ஸ்-கோவி-1 (SARS-COV-1; Severe Acute Respiratory Syndrome-Corona Virus-1) என்ற வைரஸின் மூலக்கூறுகளை ஒத்து இருந்தது மேலும் இதன் புரதக்கூறுகள் (Amino Acids Sequence) 94.6 சதவீதம் ஒத்துப்போயிருந்தது. சார்ஸ்-கோவி-1 வைரஸ் 2003 ஆம் ஆண்டு பிப்ரவரி மாதம் கடைசியில் சீனாவில் கண்டுபிடிக்கப்பட்டது, அது தீவிர நோய் பரவலை (Outbreak) ஏற்படுத்தி ஆசியக்கண்டத்தை ஆட்டிப்படைத்தது. அதுவும் கோவிட்-19 மாதிரி நுரையீரலை தாக்கி பெரிய சுவாசக்கோளாறு பிரச்னையை ஏற்படுத்தி உயிரை கொன்றது.

அப்போது அமெரிக்காவில் உள்ள நோய் கட்டுப்பாடு மற்றும் தடுப்பு மையமும் (Center for Disease Control and Prevention, CDC), கனடாவில் உள்ள தேசிய நுண்ணுரியல் ஆய்வகமும் (National Microbiology Laboratory, NML) சேர்ந்து ஆராய்ச்சி செய்து சார்ஸ்-கோவி-1 வைரஸின் மரபணு கூறுகளை (Genome) ஏப்ரல் 2003 ல் கண்டுப்பிடித்து இவ்வுலகிற்கு அறிவித்தது. 

அதன் பிறகு 2012 ஆம் ஆண்டு இதே மாதிரி சவூதி அரேபியாவில் பெரும் தொற்று ஏற்பட்டு அமெரிக்கா, ஐரோப்பா மற்றும் ஆசியா என்று 27 நாடுகளுக்கு பரவியது. அதுவும் இதே மாதிரி நோய் அறிகுறிகளை தான் கொண்டிருந்தது. அதற்கு மெர்ஸ்-கோவி (MERS-COV; Middle East Respiratory Syndrome-Corona Virus) வைரஸ் என்றழைக்கப்பட்டது.

2013 ஆண்டு டிசம்பர் மாதம் மத்திய ஆப்பிரிக்காவில் புதுவித வைரஸ் நோய் பரவியது. அது மனிதர்களுக்கு கடுமையான உயிரை கொல்லும் வயிற்றுப்போக்கை ஏற்படுத்தியது. இந்த வைரஸின் பெயர் எபோலா (Ebola) வைரஸ் (Zaire Ebolavirus). இதுவும் தீவிரமாக பல நாடுகளுக்கு பரவியது.

2019 ல் ஏற்பட்ட வைரஸின் தாக்கம் சார்ஸ்-கோவி-1 நோயை ஒத்து இருந்ததாலும் அதன் புரதக்கூறுகள் 94.6 சதவீதம் ஒத்துப்போனதாலும் இந்த வைரஸூக்கு சார்ஸ்-கோவி-2 (SARS-COV-2; Severe Acute Respiratory Syndrome-Corona Virus-2) என்று பெயரிடப்பட்டது. COVID-19 என்பது கொரோனா வைரஸ் நோய் (Corona Virus Disease)-2019 என்பதின் சுருக்கமாகும்.

அடுத்தடுத்து உலக நாடுகள் இந்த கொரோனா வைரஸ் நோய்களுக்கு உள்ளாவதால் இதை கட்டுப்படுத்த மருத்துவ உலகம் தீவிர ஆராய்ச்சியில் இறங்கியது. அதன் பயனாக மருந்துகள் மற்றும் தடுப்பூசிகள் கண்டுபிடிக்கப்பட்டன. சில மருந்துகள் இன்னும் ஆராய்ச்சி (Phase-2 or Phase-3) நிலையில் தான் இருக்கின்றன. அந்த மாதிரி ஆராய்ச்சி நிலையில் இருக்கும் ஒரு மருந்து தான் ரெம்டெசிவிர் (Remdesivir) ஆகும்.

பொதுவாக ஏற்கனவே உபயோகத்தில் இருக்கும் ஒரு மருந்தை இன்னொரு நோயுக்கு அல்லது புதிதாக உருவான நோயுக்கு பயன்படுத்துவதை மறுபயன்பாடு (Repurposing) என்று அழைப்பார்கள். உதாரணமாக தலிடோமைடு (Phthalidomide) என்ற மருந்து (Drug) பெண்களின் கர்ப்ப காலத்தில் வரும் வாந்தியை (Morning sickness) தடுப்பதற்கு மருத்துவர்களால் பரிந்துரைக்கப்பட்டது. அந்த மருந்தை உட்கொண்டவர்களின் குழந்தைகள் அதிர்ச்சி அளிக்கும் வகையில் கை கால் வளர்ச்சி இன்றி பிறந்தன. அதற்கு போக்கோமிலியா (Phocomelia) என்று பெயர். அதன்பிறகு அந்த மருந்தை தடை செய்தார்கள்.

இதே மருந்து பல கட்ட ஆராய்ச்சிகளுக்கு பிறகு இப்பொழுது தொழுநோயுக்கும் (Leprosy) மற்றும் புற்றுநோயுக்கும் (Multiple myeloma) சில முன்னெச்சரிக்கையுடன் பரிந்துரைக்கப்படுகிறது. அதுமாதிரி ரெம்டெசிவிர் (Remdesivir) மருந்தும் முதன்முதலில் எபோலா (Ebola) வைரஸ் நோயை குணமாக்குவதற்காக க்ளீயாட் சயின்ஸஸ் (Gilead Sciences) என்ற மருந்து கம்பெனியால் கண்டுபிடிக்கப்பட்டது. ஆனால் இந்த மருந்து எதிர்பார்த்த செயல்திறனை (Efficacy) பெற்றிருக்கவில்லை என்று தரக்கட்டுப்பாட்டு துறையால் பயன்பாட்டுக்கு ஒப்புதல் அளிக்கப்படவில்லை. 

அதேசமயம் இந்த மருந்து சார்ஸ்-கோவி-1 மற்றும் மெர்ஸ்-கோவி வைரஸ் நோய்களுக்கு எதிராக ஆய்வுக்கூடிய (In vitro) முறையிலும், உயிருள்ள சிறிய விலங்குகளிலும் (In vivo) பரிசோதிக்கப்பட்ட போது உறுதியளிக்கும் வகையில் முடிவுகள் கிடைத்தன. மேலும் இந்த மருந்து இன்னும் 3 ஆவது கட்ட (Phase-3) பரிசோதனையில் தான் உள்ளது. 

ரெம்டெசிவிர் மருந்து நியூக்ளியோசைடு (Nucleoside) தடுப்பான் (Inhibitors) வகையை சேர்ந்ததாகும். இந்த வகை மருந்துகள் ஏற்கனவே புற்றுநோயை குணப்படுத்தவும் மற்றும் வைரஸினால் ஏற்படும் தொற்று நோய்களை (HIV, HBV, HCV, HSV, CMV, VZV) குணப்படுத்தவும் மருத்துவர்களால் பரிந்துரைக்கப்படுகிறது. கீழே கொடுக்கப்பட்டுள்ள மருந்துகள் எயிட்ஸ் (AIDS) மற்றும் ஹெபடைடிஸ் பி (Hepatitis B) நோய்களை குணப்படுத்த உதவுகிறது.  

 

கொரோன வைரஸ் என்பது நேர்மறையான தனித்த இழை RNA [(+) single strand RNA (+ssRNA)] வகையை சேர்ந்ததாகும். இது நமது உடலில் மூக்கு வழியாகவோ அல்லது வாய் மூலமாகவோ உட்புகுகிறது. அதன் பிறகு இதிலுள்ள முள் (spike) போன்ற புரதம் (Protein) நம் உடலில் உள்ள ACE 2 (Angiotensin Converting Enzyme 2) ஏற்பி (Receptor) உடன் ஒட்டிக்கொண்டு நம்முடைய செல்லுக்குள் (Cell) செல்கிறது. அப்புறம் எண்டோசோம் (Endosome) க்கு இடமாற்றம் (Translocated) பெற்று அங்குள்ள புரோட்டியேஸ் (Protease enzyme) நொதி மூலம் முள் புரதம் (Spike protein) பிளவு (Cleave) ஏற்பட்டு வைரஸின் மரபணு (Virus genome) வெளியேறி பாலிப்ரோட்டின்ஸ் (Polyproteins, PP1a & PP1b) ஆக மாறுகிறது. இந்த பாலிப்ரோட்டின்ஸ், RdRp (RNA dependent RNA polymerase) நொதி (Enzyme) மூலம் புது வைரல் மரபணுவாக (Viral genome) பிரதிபலிக்கிறது (Replication). பிறகு நம் செல்லில் உள்ள எண்டோபிளாஸ்மிக் ரெட்டிகுலம் (Endoplasmic reticulum) மூலம் உருவாகும் முள் புரதத்தையும் (Spike protein) மற்றும் கட்டமைப்புக்கான (Structural) மற்ற புரதங்களையும் (proteins) சேர்த்து புது வைரஸாக செல்லில் (Cell) இருந்து வெளியேறுகிறது (exocytosis). இவ்வாறு கொரோனா வைரஸ் நம் உடலுக்குள் சென்று புது வைரஸாக மாற 6 படிநிலைகளை கடந்து பெருகுகிறது (Multiplication).  

இந்த 6 படிநிலைகளில் ரெம்டெசிவிர் (Remdesivir) மருந்து 4ஆம் படிநிலையான RdRp (RNA dependent RNA polymerase) நொதியின் (enzyme) செயல்பாட்டை தடுக்கிறது. ஏனென்றால் இந்த நொதி (enzyme) வேலை செய்வதற்கு ATP (Adenosine Triphosphate) என்ற நியூக்ளியோடைடு (Nucleotide) மிகவும் அவசியமாகும். இந்த நியூக்ளியோடைடு (Nucleotide) RdRp நொதியுடன் சேர்ந்து புது மரபணுவை உண்டுபண்ணும்.

பொதுவாக ரெம்டெசிவிர் (Remdesivir) மருந்து என்பது ஒரு சார்பு மருந்து (Prodrug) வகையை சேர்ந்தது. இதற்கென்று தனித்த மருத்துவ குணம் கிடையாது. இது நமது உடம்பில் சென்ற பிறகு தான் வளர்சிதை (Metabolise) மாற்றம் அடைந்து உண்மையான மருந்தாக மாறுகிறது. ஏனென்றால்  நியூக்ளியோசைடு (Nucleoside) தடுப்பான் (Inhibitors) மருந்துகளை அவ்வளவு சீக்கிரம் நம் உடலால் உறிஞ்சிக்கொள்ள (Absorption) முடியாது. அதற்காக உண்மையான மருந்தை (Drug) சார்பு மருந்தாக (Prodrug) மாற்றி நம் உடலில் செலுத்துவார்கள். அது நமது உடலில் நியூக்ளியோடைடு (Nucleotide) ஆக மாற்றம் பெற்று ATP (Adenosine Triphosphate) வடிவமைப்புக்கு ஒத்ததாக மாறுகிறது.

ரெம்டெசிவிர் (Remdesivir) மருந்து ATP (Adenosine Triphosphate) வடிவமைப்புக்கு ஒத்து உள்ளதால் இம்மருந்து RdRp (RNA dependent RNA polymerase) நொதியுடன் (enzyme) சேர்ந்து புது மரபணு உண்டுபண்ணுவதை தடுத்து விடுகிறது.

இப்பொழுது அமெரிக்காவில் உள்ள நோய் கட்டுப்பாடு மற்றும் தடுப்பு மையம் (Center for Disease Control and Prevention, CDC) இந்த மருந்தை பரிந்துரை (Recommendation) பட்டியலில் (List) இருந்து எடுத்து விட்டது. இதனுடைய செயல்திறன் (efficacy) என்பது மிகவும் குறைவுதான், மேலும் இது அனைத்து மக்களுக்கும் உபயோகமானதாக இல்லை. 

தற்சமயம் கொரோனா சிகிச்சை முறையை மூன்றாக பிரித்துள்ளார்கள். முதல்நிலையில் இந்த வைரஸ் மூக்கு தொண்டை பகுதியில் இருக்கும். அப்போது காய்ச்சல்,  உடல்வலி, மூக்கு ஒழுகுதல், சுவை மறத்து போதல் போன்ற அறிகுறிகள் இருக்கும். இது 1-5 நாட்கள் இருக்கும். உடலில் எதிர்ப்பு சக்தி உள்ளவர்களுக்கு இந்த நிலையிலே நோய் சரியாகி  விடும், மாத்திரை மருந்து தேவையில்லை. 85 சதவீதம் மக்கள் இப்படி குணமாகி விடுகிறார்கள். மீதம் இருக்கும் 15 சதவீதம் மக்கள் அடுத்த கட்டப்பாதிப்புக்கு உள்ளாகிறார்கள். இரண்டாம் நிலை என்பது அடுத்த 6-9 நாட்களுக்குள் ஏற்படக்கூடிய நுரையீரல் பாதிப்பு ஆகும். இந்த நிலையில் மருத்துவர்கள் கார்டிகோஸ்டிராய்டு (Corticosteroids) மருந்துகளை கொடுத்து குணப்படுத்தி விடுகிறார்கள். இதற்கு அடுத்த கட்டம் (மூன்றாவது நிலை) நோய் மிகவும் முற்றின வகையை சேர்ந்ததாகும் (10 தினங்களுக்கு மேல்). இதில் நுரையீரல் மிகவும் பாதிக்கப்பட்டு மூச்சு திணறல் ஏற்படுகிறது. இது பொதுவாக வைரஸினால் ஏற்படக்கூடியது கிடையாது. மாறாக இது நம் உடலில் ஏற்படும் எதிர்ப்பு சக்தினால் தோன்றக்கூடியது. இதற்கு சைட்டோகைன் (Cytokine) ஸ்டார்ம் (Storm) என்று அழைப்பார்கள். இந்த சமயத்தில் தான் நோயாளிகளுக்கு பிராணவாயு மற்றும் ரெம்டெசிவிர் (Remdesivir) மருந்து மற்றும் பிற உயிர் காக்கும் மருந்துகள் கொடுக்கப்படுகிறது. 

ஆகையால் கொரோனா நோய் தொற்று கண்டறிந்தவர்கள் மருத்துவரிடம் முறையான சிகிச்சையை காலம் தாழ்த்தாமல் பெற்றுக்கொள்ள வேண்டும். ஆனால் முகக்கவசம் அணிந்து இந்நோய் வராமல் தடுப்பதுதான் மிகச்சிறந்த வழிமுறையாகும். அப்புறம், தடுப்பூசி கிடைத்தால் உடனே போட்டுக்கொண்டு நமது உடலில் நோய் எதிர்ப்பு சக்தியை வளர்த்துக்கொள்ள வேண்டும்.

நன்றி: 

ACS Central Science 2020 6 672

European Journal of Medicinal Chemistry 2020 201 112527

MedChemComm 2019 10 200

கோவிட்-19 (Covid-19 Vaccine) தடுப்பூசி

கோவிட்-19 என்ற வைரஸ் பெரும் தொற்று நோய் உலகையே அச்சுறுத்திக் கொண்டிருக்கிறது. இந்த நோய் தொற்று முதன்முதலில் சீனா நாட்டில் ஹூபை (Hubei) மாகாணத்தில் உள்ள வூஹான் (Wuhan) நகரத்தில் டிசம்பர் 2019 ஆண்டு கண்டறியப்பட்டது.

இந்த வைரஸ், வூஹான் நகரத்தில் உள்ள கறி சந்தையில் விற்கப்பட்ட வௌவால் (Bat) கறியிலிருந்து மனிதர்களுக்கு பரவியிருக்கும் என்று மருத்துவ உலகம் நம்பியது.

உலக சுகாதார மையம் (WHO) மார்ச் 11, 2020 ல் இந்த நோய் உலகப்பெரும் தொற்று (Pandemic) என்று அறிவித்தது. கோவிட்-19 நோய் மிகக்குறுகிய காலத்தில் உலகில் உள்ள அனைத்து நாடுகளிலும் பரவி ஏராளமான உயிர்களை காவு வாங்கியுள்ளது. அது மட்டுமில்லாமல் உலக பொருளாதாரத்தையே முடக்கிப் போட்டுள்ளது. இந்த நோய் தாக்கப்பட்டவர்களுக்கு காய்ச்சல், தலைவலி, இருமல், மூக்கு ஒழுகுதல், மூச்சு வாங்குதல், மணம், சுவை அறியும் தன்மை இழத்தல், வாந்தி மற்றும் வயிற்றுப்போக்கு முதலியன முக்கிய அறிகுறிகளாக தென்பட்டன. 

இந்த நோய் சாதாரணமாக ஒருவரிடமிருந்து இன்னொருவருக்கு எச்சில் மூலமாகவோ அல்லது தொடுதல் மற்றும் தும்மலின் போது காற்றின் வழியாக சீக்கிரமாக பரவுகிறது. இந்த நோய் தொற்றின் பரவலை தனி மனித இடைவெளி (6 அடி), முகக்கவசம் மற்றும் அடிக்கடி கைகளை கழுவுதல் மூலம் கட்டுப்படுத்தலாம்.  

COVID-19 என்பது கொரோனா வைரஸ் நோய் (COrona VIrus Disease)-2019 என்பதின் சுருக்கமாகும். இந்த வைரஸ் நோய் மனிதனுடைய நுரையீரலை தாக்கி நிமோனியாவை உண்டுபண்ணி (நுரையீரலில் நீர் கோர்த்துக்கொள்வது) சுவாசிக்க முடியாமல் செய்து அதன்மூலம் உடலில் உள்ள முக்கிய உறுப்புக்களை வேலையிழக்க செய்து கடைசியில் உயிரை கொல்கிறது. மருத்துவ உலகம் இந்த வைரஸை சார்ஸ்-கோவி-2 (SARS-COV-2; Severe Acute Respiratory Syndrome-Corona Virus-2) என்றழைக்கிறது. இந்த நோய் முதல் அலையில் அதிகமாக வயதானவர்களை தாக்கியது மேலும் சுவாச நோய், நீரிழிவு நோய் மற்றும் இதய நோய் உள்ளவர்களை அதிகம் பாதித்தது. கோவிட்-19 தாக்கியவர்களை முதலில் தனியாக பிரித்து அவர்களுக்கு தேவையான சிகிச்சை அளிக்கப்பட்டது. நோய் எதிர்ப்பு சக்தி உள்ளவர்களுக்கு இந்த நோய் 7 லிருந்து 10 நாட்களுக்குள் சரியாகி விடும். இந்த காலத்தில் நோயுற்றவர்கள் தேவையான சத்துள்ள உணவு பொருட்களை முக்கியமாக வைட்டமின் C & D நிறைய எடுத்துக்கொள்ள வேண்டும். 

நோய் எதிர்ப்பு சக்தி குறைவாக உள்ளவர்களுக்கு சுவாச பிரச்னை ஏற்படும். அவர்களுக்கு பிராணவாயு (Oxygen) தனியாக கொடுக்க வேண்டும் (வெண்டிலேட்டர் மூலமாக) மற்றும் மருத்துவரின் மேற்பார்வையில் முக்கிய மருந்துகளை (Remdesivir மற்றும் Corticosteroids) கொடுத்து குணப்படுத்தலாம். 

கோவிட்-19 வைரஸ் தன்னைத்தானே உருமாற்றிக்கொண்டு வெவ்வேறு வடிவில் இரண்டாம் அலை, மூன்றாம் அலை என்று உக்கிரமாக வெளிப்படுத்தி அதிவேகமாக பரவி மேலும் மேலும் உலக மக்களை அச்சுறுத்துகிறது. ஆகையால் இதை கட்டுப்படுத்த வேண்டுமானால் தடுப்பூசி மருந்து தான் ஒரே தீர்வு என்று உலக நாடுகளும், உலக சுகாதார மையம் மற்றும் பெரிய மருந்து நிறுவனங்களும் தடுப்பூசி மருந்துகளை கண்டுபிடிப்பதில் முனைப்பு காட்டி ஒரு வருடத்தில் முறையான தடுப்பூசிகளை மக்களுக்கு அறிமுகப்படுத்தி உள்ளது.

தடுப்பூசி என்பது கீழ்காணும் வழிமுறைகளில் தயாரிக்கப்படும்.

1. நோயை உண்டுபண்ணும் வைரஸை முழுவதும் செயல் இழக்கச்செய்து அல்லது கொன்று அதை உடம்பில் செலுத்துவது (Inactivated Vaccine)
2. நோய் உண்டுபண்ணும் வைரஸின் செயல் திறனை மட்டும் (Virulence) நீக்கி பின்பு உயிருடன் கூடிய வைரஸை உடம்பில் செலுத்துவது (Live-attanuated Vaccine).
3. நோயை உண்டுபண்ணும் வைரஸின் புரதத்தை (Protein) அதாவது COVID-19 வைரஸின் புரதத்தை (Spike protein) எடுத்து மற்றொரு நோய் உண்டுபண்ணாத வைரஸில் புகுத்தி பின்பு உடலில் செலுத்துவது (Viral Vector Vaccine).
4. நோய் உண்டுபண்ணும் வைரஸின் மரபணுவை (DNA or RNA or mRNA) மட்டும் தனியாக எடுத்து அதை கொழுமியம் நானோ துகள்களுடன் (Lipid Nanoparticles) சேர்த்து பின்பு உடலில் செலுத்துவது (Nucleic Acid Vaccine).

நியூக்ளிக் ஆசிட் (மரபணு) தடுப்பூசி என்பது Deoxyribonuclic Acid (DNA) முதலில் messenger Ribonucleic Acid (mRNA) ஆக மாற்றப்பட்டு அத்துடன் கொழுமியம் நானோ துகள்களை சேர்த்து பின்பு அதை உடலில் செலுத்துவது ஆகும். ஏனென்றால் mRNA என்பது நிலையானது அல்ல, ஆகையால் கொழுமியம் நானோ துகள்களுடன் சேர்க்கும்பொழுது mRNA நிலைத்தன்மை பெறுகிறது. இந்த முறையில் கோவிட்-19 தடுப்பூசி மருந்து தான் முதன்முதலாக தயாரிக்கப்பட்டு மக்களுக்கு செலுத்தப்பட்டுள்ளது.

உலக மருந்து நிறுவனங்கள் மேலே குறிப்பிட்ட முறைகளில் தடுப்பூசி மருந்துகளை தயாரித்து ஒவ்வொரு நாட்டின் அரசிடமும் கட்டுப்படியான விலையில் விற்பனை செய்துள்ளன. குறிப்பாக Pfizer, Moderna, AstraZeneca, Novavax மற்றும் Janssen நிறுவனங்கள் தடுப்பூசி மருந்துகளை தயாரித்து உலகின் பெரும்பான்மையான நாடுகளுக்கு கொடுத்துள்ளது. அதுமாதிரி சீனா, இந்தியா மற்றும் ரஷ்யா நாடுகள் தங்கள் நாட்டிலே தடுப்பூசி மருந்துகளை கண்டுபிடித்து உற்பத்தி பண்ணி மக்களுக்கு அளித்திருக்கிறது.

கீழ்காணும் நாடுகளில் பின்வரும் தடுப்பூசி மருந்துகளுக்கு அங்கீகாரம் அளித்து மக்களுக்கு செலுத்தி வருகிறார்கள்.

இந்திய மக்கள் அனைவரும் தடுப்பூசியை எடுத்துக்கொள்ள வேண்டும், குறிப்பாக சுவாச நோய், நீரிழிவு நோய் மற்றும் இதய நோய் உள்ளவர்கள் மருத்துவரின் ஆலோசனையின் பேரில் தடுப்பூசியை போட்டுக்கொள்ளலாம்.

EMA - COVID-19 Vaccines

WHO - COVID-19 Vaccines

Canada - COVID-19 Vaccines

நன்றி: Nature Publications; CDC; Countries' website 

தமிழக தேர்தல் திருவிழா 2021

ஒவ்வொரு 5 ஆண்டுகளுக்கும் ஒருமுறை நடக்கும் தேர்தல் திருவிழா 2021 ஆம் ஆண்டு பிப்ரவரி மாதம் 26 ஆம் தேதி இந்திய தேர்தல் ஆணையத்தால் அறிவிக்கப்பட்டவுடன் தமிழ்நாட்டில் உள்ள அனைத்து கட்சியினரிடமும் தேர்தல் ஜுரம் தொற்றிக்கொண்டு விட்டது. தேர்தல் ஆணையம் முக்கிய நிகழ்வுகள் பற்றி கீழ்காணும் அட்டவணையை வெளியிட்டது.

ஏப்ரல் 6 ஆம் தேதி தமிழ்நாட்டில் ஒரே கட்டமாக தேர்தல் அமைதியாக நடந்து முடிந்தது. 2021 ஆண்டு கணக்கின்படி தமிழ்நாட்டில் உள்ள மொத்தம் 38 மாவட்டங்களையும் 234 தொகுதிகளாக பிரித்து  தேர்தல் நடைபெற்றது. இதில் 6.26 கோடி மக்கள் ஓட்டு போட தகுதி உள்ளவர்கள் என்று தேர்தல் ஆணையம் அறிவித்து இருந்தது. 

தேர்தல் ஆணையம் சொன்ன வாக்காளர்கள் கணக்கு சரியானதா என்று புரிய வில்லை. ஏனென்றால் இதே தேர்தல் ஆணையம் தான் ஒவ்வொரு முறையும் வெவ்வேறான கணக்கை சொல்லியிருக்கிறது. எது உண்மையான வாக்காளர்கள் எண்ணிக்கை என்று தெரியவில்லை. 

தமிழ் நாடு தேர்தல் களத்தில் இதுவரையில்லாத அளவுக்கு அதிக எண்ணிக்கையில் கட்சிகள் போட்டியில் கலந்து கொண்டது. ஏறத்தாழ 40 கட்சிகள் தனியாகவோ அல்லது கூட்டணி அமைத்தோ போட்டியிட்டன. அதுவும் இந்த தேர்தலில் பெரிய ஆளுமைகள் திரு கருணாநிதி மற்றும் செல்வி ஜெயலலிதா இல்லாத சட்டமன்ற தேர்தலாகும். அதிமுக தலைமையில் ஒரு அணி, திமுக தலைமையில் ஒரு அணி, கமல்ஹாசனின் மக்கள் நீதி மய்யம் தலைமையில் ஒரு அணி, தினகரனின் அம்மா மக்கள் முன்னேற்ற கழகம் தலைமையில் ஒரு அணி மற்றும் சீமானின் நாம் தமிழர் கட்சி தனியாகவும், மேலும் மற்ற உதிரி கட்சிகளும் இந்த தேர்தலில் பங்கேற்றன. முக்கியமாக நாம் தமிழர் கட்சி 117 ஆண் வேட்பாளர்களையும், 117 பெண் வேட்பாளர்களையும் இந்த சட்டசபை தேர்தலில் களமிறக்கி பெண்களுக்கு அரசியலில் 50 சதவீதம் ஒதுக்கீடு கொடுத்திருப்பது பாராட்டுக்குரியது.

தேசிய ஜனநாயக கூட்டணி  

மதச்சார்பற்ற முற்போக்கு கூட்டணி 

மக்களின் முதல் கூட்டணி  

அமமுக கூட்டணி 

நாம் தமிழர் கட்சி 

சகாயம் அரசியல் பேரவை கூட்டணி 

மற்ற கட்சிகள் 

கட்சி தலைவர்கள் போட்டியிட்ட தொகுதிகள் 

மொத்தமாக 72.78 சதவீதம் வாக்குகள் பதிவாகி இருப்பதாக தேர்தல் ஆணையம் அறிவித்தது. இதில் 4 கோடியே 57 இலட்சத்து 46 ஆயிரத்து எழுநூற்று தொண்ணூற்று மூன்று (4,57,46,793) ஓட்டுக்கள் EVM இயந்திரத்தின் மூலமும், 4 இலட்சத்து 89 ஆயிரத்து அறுநூற்று தொண்ணூற்று ஒன்பது (4,89,699) ஓட்டுக்கள் தபால் மூலமாகவும், மொத்தமாக 4 கோடியே 62 இலட்சத்து 36 ஆயிரத்து நானூற்று தொண்ணூற்று இரண்டு (4,62,36,492) ஓட்டுக்கள் கிடைத்துள்ளன. இதுவே குறிப்பிட தகுந்த ஓட்டு சதவீதம் தான் ஏனென்றால் கொரோனா என்ற உயிர்கொல்லி நோய் இரண்டாம் அலையாக தமிழகம் எங்கும் பரவலாக பரவிக்கொண்டிருக்கிறது என்ற சூழ்நிலையில் 70 சதவீதத்திற்கு மேல் பதிவாயிருந்தது பாராட்டத்தக்க அம்சமாகும். இதில் அதிகபட்சமாக கரூர் மாவட்டத்தில் 83.92 சதவீதமும், குறைந்த பட்சமாக சென்னை மாவட்டத்தில் 59.06 சதவீதமும் பதிவாகியிருந்தது. 

தமிழ் நாடு 2021 தேர்தல் வாக்கு சதவீதம்

தேர்தல் முடிவுகள் மே 2 ஆம் தேதி அறிவிக்கப்பட்டது. இம்முறை தமிழக மக்கள் திராவிட முன்னேற்ற கழகத்திற்கு பெருமளவில் ஆதரவு தந்து ஆட்சி கட்டிலில் அமர்த்தி விட்டார்கள். திமுக தனியாக 125 இடங்களிலும், கூட்டணியாக 159 இடங்களிலும் வெற்றி பெற்றிருக்கிறார்கள். இந்த கூட்டணியில் மதிமுக, கொமதேக, மமக மற்றும் தவாக ஆகிய கட்சிகள் உதயசூரியன் சின்னத்தில் போட்டியிட்டதால் அவர்களுடைய வெற்றியும் திமுக வெற்றியாக கணக்கில் கொள்ளப்படுவதால் திமுக மொத்தமாக 133 இடங்களில் வெற்றி பெற்றுள்ளது.

தொடர்ந்து 10 வருடங்களாக ஆளும் கட்சியாக (2011 - 2021) இருந்த அதிமுக மோசமாக தோல்வி அடையும் என்று எதிர்பார்க்கப்பட்டது. ஆனால் அவ்வாறு இல்லாமல் பாராட்டும் விதத்தில் தனியாக 65 இடங்களிலும், கூட்டணியாக 75 இடங்களிலும் வெற்றிப்பெற்று வலுவான எதிர்க்கட்சியாக வந்துள்ளது. திமுகவுக்கும் அதிமுகவுக்கும் உள்ள வாக்கு வித்தியாசம் வெறும் 3.15 சதவீதம் மட்டுமே. 

இந்த தேர்தலில் மிகவும் எதிர்பார்க்கப்பட்ட அமமுக கூட்டணி மற்றும் கமல் அவர்களின் மக்கள் நீதி மய்யம் தலைமையிலான கூட்டணி, இரண்டுமே எதிர்பார்க்காத விதத்தில் தோல்வியை சந்தித்து உள்ளன. அமமுக கூட்டணி 2.85 சதவீதமும், மநீம கூட்டணி 2.74 சதவீதமும் மட்டுமே வாக்குகள் பெற்றுள்ளன.

234 தொகுதிகளில் 117 ஆண் வேட்பாளர்களையும், 117 பெண் வேட்பாளர்களையும் தேர்தலில் நிறுத்தி போட்டியிட்ட நாம் தமிழர் கட்சி அனைவரும் ஆச்சரியப்படும் விதத்தில் 6.58 சதவீதம் வாக்குகளை பெற்று 3 ஆவது பெரிய கட்சியாக வளர்ந்துள்ளது. இக்கட்சியின் சார்பாக யாரும் சட்டமன்ற உறுப்பினராக தேர்வாகாமல் போனாலும் அனைத்து தொகுதியிலும் சீரான வாக்குகளை பெற்று அனைத்து மக்களுக்குமான கட்சியாக உருவாகி உள்ளது.

தமிழக அரசியல் கட்சிகள் பெற்ற வெற்றி மற்றும் வாக்கு சதவீதம் பட்டை வரைபடமாக (Bar Graph) கொடுக்கப்பட்டுள்ளது.

கூட்டணிகள் (திமுக கூட்டணி, அதிமுக கூட்டணி, அமமுக கூட்டணி, மநீம கூட்டணி) பெற்ற வாக்குகள், நாம் தமிழர் கட்சி மற்றும் NOTA  பெற்ற வாக்குகள் பை வரைபடமாக (Pie Graph) கொடுக்கப்பட்டியிருக்கிறது.

திமுக ஆட்சி பொறுப்பு ஏற்கும் இந்த சமயத்தில் கொரோனாவின் இரண்டாம் அலை தலைவிரித்து ஆடிக்கொண்டியிருக்கிறது. தேர்தல் பரப்புரையின் போது அனைத்து கட்சிகளும் மக்களை கூட்டி எங்களுக்கு தான் அதிகமாக ஆதரவு இருப்பதுபோல் மக்களிடம் காட்டிக்கொண்டார்கள். அதன் விளைவு கற்பனை பண்ண முடியாத தாக்கத்தை கொரோனா ஏற்படுத்தியிருக்கிறது. அதுமட்டும் இல்லாமல் அதிமுக அரசு வைத்து சென்றிருக்கும் கடன் 5 இலட்சம் கோடியாக இருக்கிறது. 10 ஆண்டுகளுக்கு பிறகு ஆட்சிக்கு வந்திருக்கும் திமுக எப்படி இவை அனைத்தையும் சமாளித்து நல்லாட்சி தருகிறது என்று பார்ப்போம்.

நன்றி: ECI, The Hindu, Wikipedia

THE HINDU 

THE TIMES OF INDIA

YAHOO NEWS

ONEINDIA